[3]- عن لعنة الشاي

صعب جداً في عالمي المحيط أن أجرب الإنعزال التام عن مجريات الأمور، أنا لست ذلك الولد الذي عاش عمره بأكمله في فقاعة هوائية خوفاً من ذرة غبار.

المشهد دلوقتي بيفكرني بأحد حلقات "توم و جيري"، من الحلقات اللي بتكون متواجدة فيها صاحبة البيت اللي مش بنشوف وشها. توم يعمل مقلب في جيري يبهدله، يقوم جيري يعمل مقلب في توم يبهدله أكثر و هما الاتنين سايبين صاحبة البيت نايمة لحد ما البيت يخرب خالص بسبب مقالبهم فتقوم صاحبة البيت تضربهم و تبهدل فيهم هم الاتنين.

مين توم ومين جيري و مين صاحبة البيت؟ هأسيب الموضوع لخيالكم شوية.

المهم أنا في وسط ده كله، عندي هوس غريب أني أعمل طبق سباجيتي حلو *كما يعرفني الكثيرون، أنا بعشق المكرونات بأنواعها* لكن مجتش الفرصة، وخصوصا أن السباجيتي اللي بتطلع في التلفزيون بيبقى شكلها شهي جداً، الواحد يخاف يعمل حاجة تكرهه في الأكل من الأساس.

....

أنا عندي هوس بتجميع الصور، حتى و إن كنت مش هستخدمها أصلاً، لكن بحس بالسعادة والرضى لما أقعد بالساعات أجمع في صور من مواقع مختلفة، ولما أبص على مكتبة الصور بتاعتي اللي تتعدى 5 جيجابايت، بحس بالفخر والسعادة. مش عارفة ليه!

.....

لم أعد أشرب كوب الشاي إلى أخره او إلى منتصفه حتى، لا أذكر متى بدأ هذا، منذ سنتين ربما؟ أعمل كوب الشاي اللي بحبه، وأحطه جنبي و أسيبه لحد ما يبرد و مكونش شربت منه حاجة، على الرغم من أني بحب الشاي ده جداً. ولكن –أخيراً- بعد عناء طويل توصلت إلى حقيقة الموضوع ده، في لعنة لعنني أحدهم بها عشان مكملش أو مشربش كوب الشاي. كل ما تبقى لي أني أعرف مين الشرير اللي يعمل فعلة زي دي؟

....

*تدوينة كتبتها و أنا بنام*