[22, 23, 24] - عن الطبطبة

عزيزي ميم،

ليه الناس مش بسيطة يا ميم؟ ليه ميكونوش زينا؟ إحنا ناس بسيطة صح؟ أنا بسيطة جداً. كل اللي بحلم بيه مكان مش زحمة ومش دوشة وشغلانة حلوة و ورد كتير وألوان كتيرة حواليا. ساعات بفكر أن ده كمان في ظروف معينة ممكن يبقى كتير وفيه ناس مش لاقية تاكل وبفكر أن ده ممكن جشع وناس مش لاقية تسكن، بس لما أجي وأفكر أن فيه ناس أحلامها أكبر من كده بكتير و بتيجي تكسر أحلام تانية كمان بفكر، ليه الناس مش بسيطة يا ميم؟

الواحد ساعات بيحتاج طبطبة وبتلاقيه نزل عياط وبيخاف الطبطبة دي تيجي ويعيط وضعفه يبان، عشان كده بيبعد أي ايد تقرب منه، اي ايد حنينة تكون عايزة تساعده، بيبعدها لأنه مش عايز يبان ضعيف و يتكسر قدام الناس، فاهمني يا ميم؟ وساعات الواحد بيكون تعب من تمثيل دور القوة والخشونة قدام الناس وبيكون عايز يعيط مرة من غير ما يكون فيه توقعات انه شخص قوي، وبيكون مستني ايد حنينة، الايد دي بقى المرة دي مش هتيجي لانها جربت مرة تطبطب عليه و هو بعدها عنه، وبكده الشخص ده بيبقى مسكين، مسكين أوي يا ميم.

.....