[25, 26, 27] - عن البشر المخيفين

أنت مش بعبع يا ميم، لكن في ناس بخاف منهم أكتر من أي بعبع. البشر مخيفون جداً. عارف أنت البشر اللي تحس أن بتلمع في عينيهم نظرة الخبث دي؟ عارف إحساس الخوف اللي مش بتحسه و أنت قدام قفص الأسد بس بتحسه قدام بشر معينين، أنت عارف انهم هيأذوك بس مش عارف إزاي و إمتى والأهم من ده كله، ليه.

أنا بخاف من البشر جداً، بخاف أتعامل معاهم، أو بمعنى أصح بقيت بخاف منهم، بقيت بخاف أتعامل مع حد و أقوله أسراري و أتطمن له، وأتفاجئ بيه تاني يوم وألاقيه حكى أسراري كلها لكل الناس، وألاقيه بيضربني في ضهري من غير ما أعرف، ومن غير ما أعرف ليه حتى. البشر مخيفون جداً.

عارف أنت البشر اللي بيمثلوا الطيبة وأنت بتقول "الله، دول طيبين و ولاد حلال" وفجأة تلاقي وش تاني خالص بيطلعلك فجأة وتتدمر كل أحلامك الوردية بخصوص الشخص ده. عارف يا ميم؟ أنا اتخدعت في ناس كتيرة أوي و بقيت بخاف أتخدع، لدرجة أني قفلت قلبي واكتفيت بالناس اللي اعرفها و مبقتش عارفة أصدق حد جديد, قلبي بقى بيفترض سوء النية في كل حاجة الناس تعملها و تقولها.

وأرجع أفكر، هل أنا كده هشة و ضعيفة؟ قولي يا ميم، ولو أني عارفة أنت هتقولي ايه.