[15] - عن الشوكولاتة .. التقليد

عزيزي،

أنا مش بحب الشماتة، لا بحب حد يشمت فيا ولا أشمت في حد، مش بحب الضعف والإستكانة اللي بتخلي حالة الشخص فيها، مش بحب الإحساس المقيت لما بيكون نفسك الأرض تنشق و تبلعك من كتر عدم إستحمالك للسخرية، مش بحب الناس واللي بيعملوه.

أنا لي قوقعتي الخاصة، تدريجياً كنت بخرج منها، كل ما أحس أن فيه بصيص أمل وأن فيه ناس هتتعامل معاك بإنسانية بعيداً عن أي إعتبارات تانية، لكن ملقيتش أن ده الموضوع. نص الحاجات اللي بتحصل بتحصل من ورا ضهرك، بتكتشف حاجات مش حلوة، بتسمع كلام مش حلو، وبتكتشف أنك أنت الغلطان عشان خرجت من القوقعة بتاعتك، وبترجعلها و بتبقى في حالة متسمحش أنك تخرج منها تاني ولو إيه حصل، حتى لو حصل وظهر شخص كويس، من بين كل الناس اللي لابسين أقنعة كويسة.

بتكتشف أن الحياة مليانة ناس شبها الشوكولاتة التقليد الوحشة دي اللي بتكون جامدة و طعمها وحش، أول ما تشوفها تفتكرها شكولاتة حلوة، تدوق حتة منها، تقول أجرب كمان ممكن تطلع حلوة، لحد ما تاكلها كلها وبطنك توجعك، وتبص حواليك متلاقيش حد تلومه غير نفسك، محدش أجبرك تاكل الشوكولاتة الوحشة و أنت عندك الشوكولاتة الحلوة. بس عارف أنت بقى المشكلة فين؟ أن الشوكولاتة الوحشة شبه الشوكولاتة الحلوة بالظبط، لازم تجرب و بطنك توجعك عشان تعرف الفرق.

بس أنت مش عارف، أنت على طول بتفخر بالرفقة والصحبة الحلوة، مش هتعرف الإحساس ده.

....

 أخبرتني إحداهن فلتبدأي يومك بإبتسامة، فلتنشري الحب و السعادة، أخر اليوم ستجدين من يردها لك مضاعفة. أنا أنشرها يومياً كما أخبرتني، لما لا تتضاعف إذاّ؟ أنا أفعل كل ما أستطيع لأجد الدافع لإكمال ما بدأت، أين ذهبت همتي إذاَ؟ ألا يكفي الحب و السعادة؟ ألا تكفي الإبتسامات؟ لما كذبتِ على إذاً؟