Wednesday, July 31, 2013

[28~31] - عن نهاية الشهر



هل أنت تقدر تعيش في مجتمع مش بيعمل حاجة غير أنه يتلصص على كل خصوصياتك؟ إن فضل ليك خصوصيات أصلاً في المجتمع ده؟بيسخر "المصريين" من المجتمعات الأوروبية ويقولوا معندهمش "الود" و "الألفة" اللي عندنا. لكن أنا شايفة أن اللي عندنا ده لا يمت للود أو الألفة بصلة، اللي عندنا ده لزوجة، رخامة، تدخل سافر في شئون و خصوصيات الغير من غير ما يكون لك الحق بده أصلاً، وغيره من الصفات اللي أدبي بيملي علي أني مقولهاش. لكن ما علينا، المجتمع ده ملوش حل، هتقول ايه في مجتمع شايف نفسه أحسن من مجتمعات العالم كلها وهو أكثرها تأخراً؟ دول لسة بيقولوا على نفسهم "أم الدنيا" ومش شايفين أن الدنيا كلها سبقتهم ومشيت أصلاً.
.....

صعب أنك تكتب حاجة مش حاسسها، عشان كده بتتعلق بأي حاجة أنت حاسسها و بتكتب عنها كتير، كتير أوي. لكن لما تخاف من حاجات كتيرة بسبب كتاباتك دي يبقى إيه فايدة الكتابة من الأساس؟
....


عايزة الشهر ده يخلص مش عارفة ليه؟ حاسة أني هبدأ بداية جديدة الشهر الجاي وأبدأ في مشاريع كتيرة متوقفة، وعمالة أقول لنفسي من أول الشهر الجاي. أما نشوف، يا رب!

4 comments:

  1. مصر في فترة من الفترات كانت أم للدنيا فعلاً, بس المهم دلوقتي إحنا هانكون إيه...ودلوقتي هي وحشة ودميمة للأسف,لكن لسه فيها مسحة جمال.

    وعشان كل القرف اللي في المجتمع,الوحدة والانطواء هما الحل(:

    ReplyDelete
  2. التدخل في حياة الناس..ده شئ نابع من فراغ العقل والقلب وده سمة الشرق للأسف..وإن شاء الله تبدي بداية جميلة من أول الشهر:)

    ReplyDelete
  3. .. :D مش عارف ليه مفيش خاصيه (لايك) هنا

    الخصوصية فى مجتمع شرفى بتتفسر لافعال غالباً بتخاف تعملها قدام الناس
    رغم انه مش بالضرورة خاااالص اصلا بعض الناس تبصلها كدا

    فكرة موضوعك جميلة
    دمتى بخير ..:)

    ReplyDelete
  4. شعب فضولي بطبعه

    ReplyDelete