Saturday, August 17, 2013

[36] - رسالة لرضوى المستقبلية.



رضوى، راء، دي رسالتي ليك.

لا لشئ إلا لأني عايزة لما أقراها كمان كام سنة أفتكر انا كنت إزاي وبقيت إزاي، حاجة كده زي الـTime Capsule، اللي بتحط جواها حاجات كتيرة تفكرك بفترة معينة من حياتك، وتخبيها في مكان و ترجع بعد سنة أو سنتين أو حتى عشرين وتسترجع الذكريات، وتفتكر.

أنا مش عايزة لما أقرأ الرسالة دي بعدين تاني، أفكر "أنا إتغيرت أوي"، عايزة مبادئي و أولوياتي متتغيرش، ولو إتغيرت ميكونش تغيير جذري يحولني للأسوأ، كما أتمنى.

عايزاكي تفضلي زي ما أنتِ، متنحازيش لحد لمجرد خوفك على مشاعره، متكذبيش و متغيريش مبادئك عشان توصلي لحاجة، متتخليش عن أفكارك اللي أنتي مقتنعة بيها عشان أفكار نص لبة.

متبطلش تتفرجي على أنيمي ولا كرتون، السن ده مجرد رقم، لكن هتحسي أنك كبرتي و عجزتي بجد لو حبستي الطفلة اللي جواكي اللي انت قدرتي تحافظي على وجودها 22 سنة. حاربي عشان أي حاجة أنتِ واثقة فيها، ومتعانديش زيادة عن اللزوم لو إكتشفتِ أنك غلطانة. إكسبِ أول معاركك، وأنتي عارفة هي إيه. إستمتعي بحياتك و سافري وخليكِ مشرقة، صدقيني ده الحل الوحيد في عصرنا ده.

حاولي تبعدي عن السياسة بقدر المستطاع، محدش فاهم هو بيتكلم في ايه و كل واحد له "مصادره" وعمرك ما هتعرفي تتناقشي مناقشة محترمة، عايزة تتناقشي؟ تناقشي في كتبك، وأفلامك، وموسيقتك. بلاش تبطلي تقرأي ولا تبطلي تسمعي موسيقى فيلم إيميلي كل ما الدنيا تضلم في وشك، هتشوفي قوس قزح في أوضتك و هتكتشفي أن أصوات العصافير اللي بيسمعوها في الكرتون حقيقية.

متتخليش عن هوسك بالصور وتجميعها، خليكِ قنوعة دايماً طول ما حياتك ملونة وجميلة، حققي أحلامك كلها و كملي الـBucket List  بتاعتك. اتعلمي الطبخ، مش عشان حد، لأ عشان أنتٍ عايزة تجربي أكلات مختلفة من اللي بتشوفيها. واقضي على الكسل اللي بياكل من وقتك كتير. اتعلمي كتير و اوعي تبقي مغرورة في يوم، هتبقي مغرورة ليه؟ كل ما تعرفي حاجة جديدة، هتلاقي اللي يعرف منك أكتر، دايماً فيه حد سابقك بخطوة، اتعلمي كتير لحد أخر يوم في حياتك. وخليكِ دايماً قريبة من ربنا.

حاولي تتقبلي الناس اللي مش بتتقبليهم و متزعليش عشان ناس ميستاهلوش وتمسكي بميم لأنه عارفك كويس وشاف كل حاجة فيكي، الوحشة والحلوة، وهو مصدر كل النصايح الذهبية بتاعتك. خليكِ عايشة في قوقعتك الخاصة ومتدخليش جواها غير اللي انتِ واثقة فيهم ... بس! متكرريش غلطات الماضي.


عندي ليكِ نصايح كتيرة يا رودي، بس أتمنى أنك لما ترجعي تقرأي الرسالة تكوني إحتفظتي بإنسانيتك ومفقدتيهاش، تكوني حققتي اماني كتيرة، وتكون عندك قطة بيضاء، وتكوني كما أنتِ.

No comments:

Post a Comment